係咪等咗呢個時候好耐呢？應該都冇人估到我起呢個時候先嚟受浸卦？
記得六七歲時就已經返教會，但種種原因令到我一直冇去受浸，而最奇妙亦最感恩嘅事就係我嘅家人已經全部受晒浸，現在只有最早信嘅我仲未浸。唔浸嘅原因有好多，有D時候覺得未做得夠好，有D時候因為靈命好低落（雖然除左初信都無乜火熱嘅時候），而最主要嘅原因係唔想加入教會，因為就算我唔浸，我自己係確信已經拎到天堂入場券。
我原生教會係傳統嘅福音派教會，雖然由細返到大，但我偏偏唔係一般聽教聽話嘅返教會小朋友，猶記得每次返崇拜時聽道就係一場辯論大會，有時我會覺得教會太離地，有時又覺得牧師只係會套語欠缺愛心，當社會事件日益頻繁，我睇唔過眼嘅野就愈來愈多。之後因為搬到老遠，令我都提唔起勁一朝早起身坐一個鐘車同個講員腦交戰，之後雖然都有返過屋企就近嘅教會，但係呢種同講台嘅人爭辯從未停止過...。
2021年某日晴晴搵師母傾計，佢就講下自己近況，就講到我哋靈命好差，好耐都無返教會，而師母話咁樣唔得wo，要有穩定嘅教會生活。而當時正係我哋搬開出嚟住，我就開始搵下長沙灣有乜教會適合，結果一間都搵唔到。但就係我搵嘅途中，搵到一條“甚麼是流堂？”嘅短片，我就問晴晴試唔試下，佢答“超好”，咁我哋就返左第一次flow church啦！
重記得完左第一次崇拜，潘sir話有新朋友揮手區可以認識下佢哋，我就同晴晴講快D走，話依家咁幾好丫，可以同教會保持一個距離，唔似以前要俾人拉住要應酬...。
如是者，又過咗半年，限聚令開始，由實體崇拜變成網崇，由實體嘅聖餐變成實時網上一同聖餐（題外話：流堂係唔駛受過浸嘅人先可以領聖餐，只要你真心誠意相信就可以接受聖餐），而晴晴第一次接受聖餐時真係喊左出嚟！有時會諗係咪因為我硬頸緣故，令到晴晴都選擇陪我唔浸，雖然係我帶佢返，但受浸呢樣野都好個人！
好，講返網崇，之後政府雖然放寬左可以宗教場所自由聚會但必先要打針，但我係零針，崇拜就一定無我份，但流堂嘅厲害就係佢唔再借教堂，卻在自己studio搞私人嘅崇拜，而無打針嘅我終於有機會返崇拜。好難想像以前返崇拜好似係去維園城市論壇嘅我，原來有幾咁渴望返到神面前敬拜、聽講道、聖餐...每一個時刻都唔想錯失，而我就立即拉左晴晴參加Inflow group。我已經唔想再做遠距離觀察員，我要更加投入FC裡面，之後等左半年終於入到小組。而流堂有好多Club，試過最瘋狂一星期有五日都係喺FC參與活動，就算起個山都係參加緊流堂山系。
突然講見證變左Flow Church廣告雜誌，但係有一樣野我知道我係同以前唔同嘅，以前返教會好大程度上係一種習慣同朋友間羈絆，神唔係唔重要，但亦都唔係最重要。依家喺FC雖然有珍貴嘅組員，亦有一班志同道合嘅朋友，但係今次個位擺得好啱，
因為神嘅緣故我先會起呢個地方，因為神嘅緣故，我需要講呢個見證，今日我要受浸加入神呢個大家庭。
見証錄音：
Comments